Raah dekhi thi is din ki kabse

Aage ke sapne saja rakhe the naa   jaane kab se

Bade utavale the yahaan se jaane ko

Zindagi ka agla padaav paane ko

Par naa jane kyon ..dil mein aaj kuch aur aata hai

Waqt ko rokne ka jee chahta hai

Jin baaton ko lekar rote the

Aaj un par hansi aati hai

Na jaane kyun aaj un palon ki yaad aati hai

Kaha karta tha ..badi mushkil se chaar saal seh gaya

Par aaj kyun lagta hai ki kuch peeche reh gaya

Kahi ankahi hazaaron baatein reh gayi

Na bhoolne wali kuch yaadein reh gayi

Meri taang ab kaun kheecha karega

Sirf mera sar khane kaun mera peecha karega

Jahaan 2000 ka hisaab nahin


wahaan 2 rupay ke liye kaun ladega

Kaun raat bhar saath jag kar padega

Kaun fail hone par dilasa dilayega

Kaun galti se number aane par gaaliyaan sunayega

Buddy's mein coffee kis ke saath piyoonga

Wo haseen pal ab kis ke saath jiyoonga

Aise dost kahaan milenge jo khaai mein bhi dhakka de aayein

Par fir tumhein bachane khud bhi kood jayein

Meri ghazlon se pareshaan kaun hoga

Kabhi muje kisi ladki se baat karte dekh hairaan kaun hoga

Professors ke PJ par RAKSHAS ki tarah kaun hansega

"pugai mein haarne wale ki treat"..is chakkar mein ab kaun fansega

Stage par ab kis ke saath jaoonga

Juniors ko faltoo ke lectures kaise sunaonga

Doston ke liye professor se kab lad payenge

Kya hum ye fir kar payenge

Raat ko 2 baje pohe khane kaun jayega

3 gilaas lassi peene ki shart kaun lagayega

Kaun mujhe meri kabiliyat par bharosa dilayega

Aur jyada hawa mein udne par zameen pe layega

Bas ek baat se dar lagta hai doston

Hum ajanabi na ban jayein doston

Zindagi ke rangon mein dosti ka rang feeka na pad jaye

Kahin aisa na ho doosre rishton ki bheed mein dosti dum tod jayye

Zindagi mein milne ki fariyaad karte rehna

Agar na mil sakein to kam se kam yaad karte rehna

Chahe jitna hanslo aaj mujh par, mein bura nahi manooga

Is hansi ko apne dil mein basa loonga

Aur jab yaad aayegi tumhari, yahi hansi lekar thoda muskura loonga.